01/01/2025
Pagsulay ug Paglambo: Ang Pagpasalamat sa Ginoo ug Pagpadayon sa Pangandoy
3:49 AM
Dear Akong Kaugalingon,
Una sa tanan, Malipayong Bag-ong Tuig!
Walay kataposang pagpasalamat ko sa Ginoo alang sa iyang walay puas nga pagkamatarong ug pagkamaayo sa akong kinabuhi. Karon nako mas nasabtan kung nganong gihatagan ko Niya og mga pagsulay ug kalisdanan. Salamat sa kinabuhi nga imong gihatag kanako ug sa akong pamilya. Bisan pa man sa kalisod ug kapobre, wala gyud Nimo kami gibiyaan. Ang akong kasingkasing puno sa pasalamat kanimo, O Ginoo.
Paglantaw nako
sa miaging tuig nga 2024, di gyud lalim. Sugod ko isip usa ka clerk sa
Savemore, apan na-layoff ko pag-May. Tungod kay walay kapilian, nag-apply ko
isip crew sa Jollibee pag-June. Didto nagsugod ang panahon nga murag dili na
gyud ko magkadimao. Di na maihap ang mga gabii nga naghilak ko tungod sa
kakapoy. Walay kataposang pangutana ang nagdagan sa akong utok: "Hangtod
kanus-a man ni?" "Ngano ako?" "Kapoy kaayo!"
"Gusto nako undangon kini!"
Grabe ang mga
pagsulay, ug murag di ko katuo nga human ko makagraduate sa kolehiyo, maabot pa
ko sa punto nga mahimong underemployed. Wala ko nagdahom nga mosulod ko sa usa
ka trabaho nga pwerteng lisura, ug adunay mas deserving nga posisyon para nako.
Apan milagroso gyud ang dagan sa 2024.
Pagka Mayo,
nakabalik ko sa akong kuya, nga abi nako magtambay lang. Apan naablihan ang
oportunidad sa online jobs. Lisod ang sugod, labi na sa ESL teaching. Daghan
ko’g agi-an nga kalisdanan, apan tungod sa mga leksyon ug kalig-on nga nakuha
nako sa mga nangagi, nakabarog ko.
Fast forward:
Pag-30th of
December 2024, nakakuha ko og kaugalingong laptop pinaagi sa installment plan,
uban sa akong kaugalingong paningkamot ug sa suporta sa akong pamilya. Tungod
niini, nahimo nako nga hinay-hinay nga matuman ang akong usa sa mga damgo. Dako
kaayo kini nga achievement para kanako, ug dili ko maihap kung unsa nako
kalipay. Nahilak ko tungod sa dako nga pasalamat ug kalipay nga akong gibati.
Proud kaayo ko sa akong kaugalingon nga nakaabot ko ani nga punto.
Kabalo ko nga
layo pa kaayo ang akong maabtan, ug daghan pa ko’g pag-agian. Apan importante
nga i-celebrate nako ang kalipay nga akong naabot karong mga adlawa. Nakita
nako nga nalipay kaayo ang akong mga ginikanan alang kanako, ug kana dili gyud
mabayran.
Sa matag adlaw, magpasalamat ko kanimo, Ginoo, ug itugyan nako kanimo ang tanan. Hinaut nga dili Mo kami biyaan sa mga umaabot pa nga kalipay ug pagsulay.
Hantod dinhi
nalang tingali kay buntag na. Malipayong Bag-ong Tuig! Sugaton nato ang 2025
nga puno sa paglaom ug kalipay sa kasingkasing.
Jonas
4:08 AM
